Når publikum set seg til rette i salen og lysa sakte dimmast, er det song, dans og skodespel som møter dei. Det få tenkjer på, er alt arbeidet som skjer bak kulissane. For elevane på VG1 Teknologi- og industrifag er musikalen like mykje eit teknisk prosjekt som ei kunstnarisk framsyning.
Ein av elevane som har hatt ei sentral rolle i arbeidet bak scena, er Birk. Han har hatt ansvar for å byggje trapper og høge boksar som blir brukte på scena – konstruksjonar som må vere både stabile, trygge og funksjonelle.
– Eg har laga trappene og dei høge boksane som skodespelarane skal bruke på scena, forklarer han.
Arbeidet krev meir enn berre praktisk innsats. For å få konstruksjonane ferdige har Birk brukt fleire ulike maskiner og verktøy.
– Vi brukar CC-maskiner, skjerebenk og arbeidsbenk, i tillegg til vanlege handverktøy som hammer, skruar og spikar. Det er viktig å vite kva ein gjer, elles kan det bli farleg, seier han.
Å jobbe med ein musikal handlar ikkje berre om eigne oppgåver, men om samarbeid mellom mange ulike faggrupper. Samstundes er det ikkje alltid lett for elevane å ha full oversikt.
– Det er læraren som har hovudansvaret og held oversikta over heilskapen, fortel Birk. Vi jobbar mest med vår del, men må stole på at alt passar saman til slutt.
Han meiner det er vanskeleg å peike på ei enkelt oppgåve som er viktigast i produksjonen.
– Eg trur ingen eigentleg har full kontroll aleine. Det er så mange delar som må fungere samtidig, seier han, og understrekar kor komplekst prosjektet er.
Ei av dei største utfordringane i arbeidet har vore å få kulissane til å fungere praktisk på scena.
– Boksane er store og tunge, og det er ikkje alltid lett å få dei inn og på plass. Når noko ikkje fungerer som planlagt, må vi finne nye løysingar, forklarer han.
– Då må vi bruke andre og meir avanserte maskiner, og tenkje litt annleis.
For elevar som vurderer ei framtid innan teknisk produksjon, meiner Birk det er fleire ferdigheiter som er avgjerande.
– Ein må forstå korleis maskinene fungerer, bruke augemål og stole på eigne vurderingar. Og så må ein vere nøyaktig, seier han.
Lærar Geir har hatt ei sentral rolle i organiseringa av musikalproduksjonen og samarbeidet mellom dei ulike faggruppene. Han fortel at elevane no er godt i gang med arbeidet.
– Vi held på med produksjon av både rekvisittar og kulissar til årets musikal, seier han, og legg til at dette gir elevane verdifull praktisk erfaring.
Geir har jobba med musikalproduksjon i rundt åtte til ti år, og meiner denne typen prosjekt gir elevane eit realistisk bilete av arbeidslivet.
– Elevane har ulike haldningar til musikalproduksjon. Nokre synest det er veldig engasjerande, medan andre opplever det som krevjande. Samstundes gir prosjektet rom for mange ulike roller, slik at alle kan bidra, seier han.
Eit viktig element i produksjonen er samarbeidet med FBIE, som gjer arbeidet meir tverrfagleg.
– Samarbeidet med FBIE styrkjer kvaliteten på produksjonen og gir elevane erfaring med korleis ein jobbar i større prosjekt, forklarer Geir.
I arbeidet blir det teke i bruk eit breitt spekter av verktøy og maskiner, noko som stiller store krav til både planlegging og tryggleik.
Alt i alt viser musikalproduksjonen at ei framsyning er resultatet av langt meir enn det som møter publikum i salen. Bak scena ligg det timevis med teknisk arbeid, samarbeid og problemløysing – erfaringar elevane kan ta med seg vidare, både i utdanning og arbeidsliv.
