Siste innspurt for rockebrus 

UTDANNING: Karane i RockeBrus UB nærmar seg sakte, men sikkert målet: Å lansere rockebrus til Malakoff Rockfestival på påsketreffet i slutten av mars.

 

Ideen om ei eiga Malakoff-brus kom på gründercampen ved Eid vidaregåande skule i 2008. I haust skipa Sondre Berg (17), Eivind Holmboe (19), Dziugas Matukas (18) og Neveed Hakimi (24) ungdomsbedrifta RockeBrus UB.

 

Brus- og artistslepp

Målet er å produsere brus for fleire enn Malakoff Rockfestival, men akkurat no handlar alt om å få den første rockebrusen klar til påsketreffet i Operahuset Nordfjord 30. mars. Rockebrusen vert lansert samstundes som dei siste artistane til festivalen i sommar blir presentert.

 Nordrikk på Nordfjordeid og Oskar Sylte Mineralvannfabrikk i Molde er i tillegg til Malakoff nære samarbeidspartnarar for RockeBrus UB. Mentoren deira er Oddvin Hansen, dagleg leiar i Nordrikk, og Oskar Sylte skal produsere brusen.

 

Siste innspurt

For eit par veker sidan besøkte Sondre, Eivind, Dziugas og Neveed mineralvatnfabrikken i Romsdal. Det gav gode resultat. No gjenstår berre dei siste detaljane før avtalen med Oskar Sylte er i boks og produksjonen kan starte. Om kort tid må òg etikettane vere klare, og det skal skrivast avtale med Malakoff Rockfestival.

 Facebook-gruppa til RockeBrus UB hadde før helga over 600 tilhengarar. Målet er å kome opp i 2.000 medlemmer innan 30. mars.

 

Støttar sjukehus og Mbala

RockeBrus skal òg produsere eiga brus til fylkesmessa for Ungt entreprenørskap på Nordfjordeid 11. mars. Halvparten av overskotet derifrå går til aksjonen for Nordfjord sjukehus.

 – Vi er ei lokal ungdomsbedrift og vil difor satse på lokale prosjekt. Sjukehuskampen er ei viktig sak for å unngå meir fråflytting, og vi vil gjerne bidra, seier dei fire bedrifseigarane.

 Ei krone for kvar selde rockebrus skal gå til Mbala High School som Eid vidaregåande skule samarbeider med.

 

Jobbar godt

Å drive ungdomsbedrifta er ein del av skulekvardagen på Vg2 Sal, service og tryggleik. Karane fortel om mykje jobb, men det hadde dei rekna med, til liks med motgang undervegs.

 – Utan motgang kjem ein ingen stad, seier dagleg leiar Sondre Berg.

 Sondre, Eivind, Dziugas og Neveed har funne ein god måte å jobbe på. Dei set fristar på ting undervegs, er effektive, gjev beskjed viss nokon er vekke, jobbar heime og formidlar sitt eige arbeid til dei andre i bedrifta via nettet.

 

Bra utdanning

Mentor Oddvin Hansen får mykje skryt frå dei fire elevane.

 – Han er vanvittig dyktig, inspirerer, er positiv, har lyst til å hjelpe, gjev oss gode idear og fortel oss kva vi må passe på, seier Sondre, Eivind, Dziugas og Neveed som òg har berre positivt å seie om læraren Leiv Johnny Endal.

 Dei satsar også stort mot fylkesmessa 11. mars og håpar dei der kan bidra til at fleire ungdommar søkjer på Service og samferdsel-utdanninga.

 – Det er ei flott linje, fortel brusgutta som set pris på å få jobbe praktisk på skulen, ikkje berre med teori.